12th Tamil Refresher Course Answer key - Topic 1-2

Class: 12

Subject : Tamil | புத்தாக்கப் பயிற்சிக் கட்டகம்  | 2021 - 2022

கற்றல் - கற்பித்தல் செயல்பாடுகள் 

மதிப்பீடு வினாக்களும் , விடைகளும்.

தலைப்பு  : 1  அ. பகுபத உறுப்புகள்

பதம் என்பதன் வரையறை:

ஓர் எழுத்துத் தனித்தோ (அ) ஒன்றிற்கு மேற்பட்ட எழுத்துகள் தொடர்ந்து வந்தோ பொருளைத் தந்தால் அது பதம் எனப்படும். பதம் - பகுபதம், பகாபதம் என இரண்டு வகைப்படும்.

“எழுத்து தனித்தும் தொடர்ந்தும் பொருள்தரின் பதமாம்

அது பகாப்பதம், பகுபதம் என இருபாலாகி இயலும் ”

என்ப.(நன்னூல் –128)

பதம் = சொல், கிளவி, மொழி என்பர்

பகுத்தல் = பங்கிடுதல், கூறிடுதல், பிரித்தல் என பொருள் கூறலாம.

1. பகுதி: (முதனிலை)

• " ஒரு சொல்லின் முதலில் வரும் அடிச்சொல்லே பகுதி ஆகும். இதனை வேர்ச்சொல் என்றும் அழைப்பர்.
• " விகுதி பெறாத கட்டளை (அ) ஏவல் வினையே பகுதி.

சான்று :

• " நடந்தான் = நட, ஓடினான் = ஓடு, படித்தான் = படி. 

இதில் நட, ஓடு,படி என்பன பகுதி.

• " பெற்றேன் = பெறு (பெற்று இறந்த காலம் காட்டியது.) + ஏன்

பகுதி ஒற்று இரட்டித்துக் காலம் காட்டும்.

2. விகுதி: (கடைநிலை)

• " சொல்லின் இறுதியில் வரும்.
• " திணை, பால், எண், இடம் ஆகியவற்றைக் காட்டும்.

சான்று :

• படித்தான் = படி + த் + த் + ஆன் ( ஆன் - உயர்திணை, ஆண்பால், ஒருமை, படர்க்கை ஆகியவற்றைக் காட்டி நிற்கிறது)

• வியங்கோள் வினைமுற்று விகுதி = க, இய, இயர் (எழுதுக = எழுது + க)

• தொழிற்பெயர் விகுதி = தல் ( செய்தல் = செய் + தல் )

• பெயரெச்ச விகுதி = அ, உம் ( உரைத்த = உரை + த் + த் + அ)

• வினையெச்ச விகுதி = இ, உ ( படித்து = படி + த் + த் + உ )

(இதேபோல் தன்மை, முன்னிலை, படர்க்கை - ஒருமை, பன்மை வினைமுற்று விகுதிகளும் வரும்.

செயல்பாடு: 3

3. இடைநிலை:

" பகுதிக்கும் விகுதிக்கும் இடையில் வரும்.

" காலத்தைக் காட்டும்.

" வினைச் சொற்களில் பெரும்பாலும் இடைநிலை வரும்.

• 1. நிகழ்கால இடைநிலை - கிறு, கின்று, ஆநின்று
• 2. எதிர்கால இடைநிலை - ப், வ்
• 3. இறந்த கால இடைநிலை - த், ட், ற், இன்
• 4. எதிர்மறை இடைநிலை - ஆ, அல், இல்

சான்று :

" நடந்தான் = நட+ த்(ந்)+த்+ஆன்

" பேசான் = பேசு + (ஆ) +ஆன்

 மதிப்பீடு 

1. பதம் என்பதன் வரையறை யாது?

  ஓர் எழுத்துத் தனித்தோ (அ) ஒன்றிற்கு மேற்பட்ட எழுத்துகள் தொடர்ந்து வந்தோ பொருளைத் தந்தால் அது பதம் எனப்படும்.

சான்று :  மா 

                  மாமழை 

2. விகுதி என்றால் என்ன?

• சொல்லின் இறுதியில் வரும்.
• திணை , பால் , எண் , இடம் ஆகியவற்றைக் காட்டும்.

சான்று :

படித்தான் - படி + த் + த் + ஆன்

திணை : உயர்திணை

பால்       : ஆண்பால் 

எண்      : ஒருமை 

இடம்     : படர்க்கை

தலைப்பு  : 2   ஆ.  பகுபத உறுப்புகள்

செயல்பாடு: 1

4. சாரியை

" இடைநிலைக்கும் விகுதிக்கும் இடையில் வரும்.

• சான்று : பார்த்தனன் = பார் + த் + த் + அன் + அன்
• " சந்தி வர வேண்டிய இடத்தில் உயிர்மெய் எழுத்து வந்தால் அதனை சாரியை என்று குறிப்பிடல் வேண்டும்.

சான்று :

• " தருகுவென் = தா ( தரு) + கு + வ் + என்
• " சாரியைக்குப் பொருள் இல்லை.

குறிப்பு :

• " அன், அள், அர் விகுதிக்கு ’அன்’னே சாரியை.

• " ஆன், ஆள், ஆர் விகுதிக்கு ’அன்’ சாரியை வராது.

செயல்பாடு : 2

5. சந்தி

• " பகுதிக்கும் இடைநிலைக்கும் இடையில் வரும்.

• " சந்தி என்பதற்குப் புணர்ச்சி என்று பெயர்.

• " சந்தியாக வரும் எழுத்துகள் - த், ப், க்

• " உடம்படு மெய்களும் ( ய், வ் ) சந்தியாக வரும்.

சான்று :

• " அசைத்தான் = அசை + த் + த் + ஆன்

• " மயங்கிய = மயங்கு + இ (ன்) + ய் + அ

செயல்பாடு : 3

6. விகாரம்

• பகுதி, விகுதி இடைநிலை ஆகியவை புணரும்போது அவற்றின் வடிவில் ஏற்படும் மாற்றம் விகாரம் ஆகும்.

சான்று

• " நின்றான் = நில் (ன்) + ற் + ஆன் ( திரிதல் )
• " வணங்கிய = வணங்கு + இ (ன்) + ய் + அ ( கெடுதல்)
• " கண்டான் = காண் ( கண் ) + ட் + ஆன் ( நெடில் குறிலாகக் குறுகியது )

எழுத்துப்பேறு :

• " பகுபத உறுப்புகளில் அடங்காமல் ஏழாவது உறுப்பாக வரும் உறுப்பு

• " காலம் காட்டாது

• " எழுத்துப்பேறாக வரும் எழுத்து = த்

சான்று :

• " பாடுதி = பாடு ( பகுதி ) + த் (எழுத்துப்பேறு) + இ (முன்னிலை ஒருமை வினைமுற்று விகுதி)
• " மொழியாதான் = மொழி+ய்+ஆ (எதிர்மறை இடைநிலை)+த் (எழுத்துப்பேறு) + ஆன்

                                                                மதிப்பீடு 

1. காண்பித்தான் - பகுபத உறுப்பிலக்கணம் தருக.

காண்பித்தான் - காண்பி + த் + த் + ஆன்

• காண்பி - ( பிறவினைப் ) பகுதி 

• த்  - இறந்த கால இடைநிலை 

• த்  - சந்தி 

• ஆன் - படர்க்கை ஆண்பால் வினைமுற்று விகுதி.

2. எழுத்துப்பேறு வரையறு.

• பகுபத உறுப்புகளில் அடங்காமல் ஏழாவது உறுப்பாக வரும் உறுப்பு

• காலம் காட்டாது

• எழுத்துப்பேறாக வரும் எழுத்து = த்

சான்று :

• பாடுதி = பாடு ( பகுதி ) + த் (எழுத்துப்பேறு) + இ (முன்னிலை ஒருமை வினைமுற்று விகுதி)

3. பகுபத உறுப்புகள் எத்தனை ? அவை யாவை?

பகுபத உறுப்புகள் 6 : அவை

• பகுதி 

• விகுதி

• இடைநிலை 

• சாரியை 

• சந்தி 

• விகாரம்